22 October 2016


ယနေ့ အောက်တိုဘာလ ၂၁ ရက်နေ့တွင် တရုတ်ပြည်၊ မိန်းမောဝ်းနယ်(ရွှေလီမြို့)၊ ဖွေးဟိုင်းရွာအတွင်းရှိ အများစွန့်ပစ်သည့် အမှိုက်ပုံအနီး သျှမ်းကလေးငယ်နှစ်ဦးအား ခန္ဓာကိုယ်အတွင်း ကလီစာများဖောက်ယူလျှက် စွန့်ပစ်ထားကြောင်းသိရသည်။


၎င်းကလေးငယ်နှစ်ဦးသည် တရုတ်နိုင်ငံဖွား သျှမ်းတိုင်းရင်းသားလူမျိုးစုဖြစ်ပြီး တစ်ဦးက ယောကျာင်္းလေး၊ နောက်တစ်ဦးက မိန်းကလေးတစ်ဦးဖြစ်ကြောင်း မျက်မြင်သက်သေများကဆိုသည်။ "ကလေးနှစ်ဦးက အတွင်း ကလီစာတွေဖြစ်တဲ့ အသည်း ၊ ကျောက်ကပ်တစ်မျိုးမျိုး ဖောက်ထုတ်ခံထားရပုံပဲ၊ သူတို့ဗိုက်တွေရဲ့ ချုပ်ရိုးက တစ်ခုခုခွဲစိတ်ယူပြီးပြန်ချုပ်ထားတယ်ဆိုတော့လေ၊ အရေးကြီးအစိတ်အပိုင်းတွေကိုခွဲထုတ် ယူလိုက်တော့ ကလေးတွေအတွက်က အသက်ရှင်လျှက်မဟုတ်ဘဲ အသေနဲ့ပစ်ထားတာ ၊သတင်းအစအနကိုတော့ မသိရသေးကြောင်း" နန်းထွမ်းရင်ကဆိုသည်။


ကလေးငယ်နှစ်ဦး ကျား-၁၊မ-၁ သည် ဝိသမလောဘသားများ၏ဖမ်းဆီးခြင်း၊ သို့တည်းမဟုတ် လူကုန်ကူးမှု ခံရသူကလေးငယ်များဖြစ်နိုင်ကြောင်း ခန့်မှန်းပြောဆိုနေကြသည် ။ တရုတ်နိုင်ငံသည် နှစ်စဉ် ကလေးသူငယ် ပျောက်ဆုံးခြင်း၊ လူကုန်ကူးခံရခြင်း၊ ခန္ဓာကိုယ်၏အစိတ်အပိုင်းများ ခွဲထုတ်ခံရခြင်းနှုန်းသည် ထိန်းမနိုင် သိမ်းမရ အဆင့်ထိမြင့်မားလာနေကြောင်း နန်းထွမ်းရင်ကပြောသည်။


ကလေးငယ်တွေရဲ့ဘေးမှာ ယူကြုံးမရ အော်ငိုနေတဲ့ မိန်းမကြီးတစ်ဦးလည်း တွေ့ရကြောင်း၊ သူတို့မိဘများဖြစ်နိုင်ကြောင်း မျက်မြင်တွေကပြောဆိုနေကြသည်။


၎င်းသတင်း၏ အသေးစိပ်အချက်အလက်များအား နမ့်ခမ်းသတင်းစဉ်မှ လိုက်လံစုံစမ်းသော်လည်း ပြီးပြည့်စုံသည့် အချက်အလက်များ မရရှိခဲ့ပေ။ မိဘများအနေဖြင့် မိမိကလေးငယ်များအား ကောင်းမွန်စွာကြည့်ရှု ဂရုစိုက်ရန်၊ ကျောင်းသွား/ပြန် သတိမပြတ်စောင့်ကြည့်ရန် အသိပေးသတင်းတစ်ပုဒ်မျှသာဖြစ်သည်။


Written By Sai Aik Wann(NKN)

Nam Kham News

0 comments so far,add yours